Non vale parar!

De verdade da boa que a intención era xuntarnos durante un verán, e, ao rematar, seguir cadaquén polo seu rego. E claro que nos dicían que iso non ía pasar, que non podía pasar, que, de voltar, voltar como as “personas”. Que as cousas, ou se fan ben, ou non se fan. Pero a intención era esa, de verdade da boa.

Había ese aquel de se vos lembrariades de nós, de que a xente nova agora escoita outras cousas, de se seriamos quen de que a “malladora” seguise engrasada, de que xa temos unha edá…

E resultou que si que nos lembrabades, e cun agarimo que nos chegou ben fondo. E que esa xente nova nos dixo que nos escoitaban dende moi cativos, porque seus pais eran moi fans. E que a “malladora” estivo máis engrasada ca nunca. E que, que carallo, a edá non está no carné, está no espírito, e o noso évos ben novo.

Polo tanto continuamos o camiño, e, para que nos leve ben lonxe, está ben estrear calzado. E, xa que estreamos, por qué non probar outro tipo de zapato?. Un que sexa para outro tipo de camiños, por ver onde nos leva.

E aí estaba Ainé con toda a súa experiencia no eido das artes escénicas, e con todas as ganas de traballar con nós nesta nova andaina. Unha andaina que aínda non sabemos onde nos levará, pero que sabemos que non imos facer sós, porque ben nos demostrastes o ano pasado que non o estamos, e porque o faremos da man dunha xente que leva anos facendo un traballo moi serio, pero que ten ben claro que “non hai obxectivo mellor que o de traballar e pasalo ben mentres se traballa”.

Así que aquí estamos, coma nenos con zapatos novos, e desexando volver suar con vós este verán.

Como dicían aqueles: NON VALE PARAR!!!

Seguiremos informando…